Azərbaycan Respublikası Audiovizual Şurası

Aslan Xası oğlu Xəlilov 1962-ci ildə Şamaxı rayonunda anadan olmuşdur.

1982-1985-ci illərdə Bakı Dövlət Universitetinin tarix fakültəsində təhsil almışdır. 1985-1988-ci illərdə M.V. Lomonosov adına Moskva Dövlət Universitetinin tarix fakültəsində təhsilini davam etdirmişdir. Təhsil aldığı illərdə Lenin təqaüdçüsü olmuşdur.

1989-cu ildən 2003-cü ilədək Bakı Slavyan Universitetinin tarix kafedrasında əvvəlcə müəllim, baş müəllim vəzifəsində çalışmışdır. 2003-cü ildən dosent vəzifəsində çalışır.

2003-ci ildə Azərbaycan Respublikası Prezidentinin sərəncamı ilə 2 il müddətinə Milli Televiziya və Radio Şurasının üzvü təyin edilmişdir. 2005-ci, 2011-ci və 2017-ci illərdə Azərbaycan Respublikası Prezidentinin müvafiq sərəncamları ilə 6 il müddətinə Milli Televiziya və Radio Şurasının üzvü təyin edilmişdir.

30 dekabr 2021-ci il tarixli 471-VIQ nömrəli "Media haqqında" Azərbaycan Respublikası Qanununda audiovizual media sahəsini tənzimləyən orqan kimi Azərbaycan Respublikası Audiovizual Şurası müəyyən edilmişdir. Azərbaycan Respublikası Audiovizual Şurası Azərbaycan Respublikası Prezidentinin 08 fevral 2022-ci il tarxli 1589 nömrəli Fərmanına əsasən Milli Televiziya Radio Şurasının hüquqi varisidir. Fərmanın 4.2-ci yarımbəndinə əsasən Milli Televiziya və Radio Şurasının səlahiyyət müddəti bitməmiş üzvləri həmin müddət bitənədək fəaliyyətlərini Azərbaycan Respublikası Audiovizual Şurasında davam etdirirlər.

Azərbaycan Respublikası Prezidentinin 14 aprel 2023-cü il tarixli Sərəncamı ilə Azərbaycan Respublikası Audiovizual Şurasının üzvü (səlahiyyət müddəti 5 il) təyin edilmişdir.

1996-cı ildə "1917-1920-ci illərdə Zaqafqaziyanın müsəlman əhalisinə qarşı soyqırımı tarixi mənbələrdə" mövzusunda dissertasiya müdafiə edərək tarix üzrə fəlsəfə doktoru elmi adını almışdır. Bu əsər milli tarixşünaslığımızda, 1917-1920-ci illərdə Cənubi Qafqazın müsəlman əhalisinə qarşı erməni dövlət təşkilatları tərəfindən həyata keşirilmiş kütləvi qırğınları soyqırımı kimi qiymətləndirən ilk dissertasiyadır. Həmin dissertasiya əsasında, 2000-ci ildə rus dilində nəşr edilmiş eyniadlı kitab ABŞ Konqresinin kitabxanasında, ABŞ-da yerləşən Holokost Memorial Muzeyində və dünyanın bir sıra aparıcı ölkələrinin kitabxanalarında saxlanılır. 2018-ci ildən tarix üzrə elmlər doktorudur. 2 monoqrafiya və 60-dan yuxarı elmi və elmi-publisistik məqalənin müəllifidir.

Evlidir, iki övladı var.

İsa Rəhman oğlu Məmmədov 15 oktyabr 1953-cü ildə Lənkəran rayonunun Veravul kəndində anadan olmuşdur.

1970-ci ildə Veravul kənd orta məktəbini bitirdikdən sonra Azərbaycan Politexnik İnstitutunun "Elektrotexnika" fakultəsinin birinci kursuna daxil olmuş və 1975-ci ildə həmin institutu bitirərək, "Radiorabitəsi və radioverilişi" ixtisası üzrə mühəndis adını almışdır.

Əmək fəaliyyətimə 1976-cı ildə Azərbaycan SSR Rabitə Nazirliyinin "Respublika Radio-Televiziya Verici Mərkəzi"ndə başlamış, əvvəlcə böyük elektromexanik, 1977-ci ildən isə mühəndis vəzifəsində çalışmışdır.

İsa Məmmədov Azərbaycan xalqının Ümummilli lideri Heydər Əliyevin təşəbbüsü ilə Moskva Elektrotexniki Rabitə İnstitutunun məqsədli əyani aspiranturasına göndərilmiş, 01 dekabr 1978-ci ildə əyani aspiranturaya daxil olmuş və 30 noyabr 1982-ci ildə bu institutun aspiranturasını bitirirərək, texnika elmləri namizədi elmi dərəcəsini almışdır. 2002-ci ildə Odessa Milli Rabitə Akademiyasında doktorluq dissertasiyasını müdafiə etmişdir. Azərbaycan Respublikası Prezidenti yanında Ali Attestasiya Komissiyasının 19 mart 2010-cu il tarixli qərarı ilə İsa Məmmədova professor elmi adı verilmişdir.

1983-cü ildən başlayaraq Ç.İldırım adına Azərbaycan Politexnik İnstitutunda (indiki Azərbaycan Texniki Universitetində) assistent, baş müəllim, dosent və professor vəzifələrində çalışır. 1996-2005-ci illərdə Azərbaycan Texniki Universitetində vaxtaşırı kafedra müdiri və dekan kimi fəaliyyət göstərmiş, paralel olaraq 1997-2003-cü illərdə Azərbaycan Dövlət Dəniz Akademiyasının "Gəmi radioavadanlığı" kafedrasının müdiri olmuşdur.

2004-cü ildən Azərbaycan Respublikası Milli Televiziya və Radio Şurasının aparatında "Texniki şöbə"nin rəisi, 2008-ci ildən "Maliyyə və texniki nəzarət şöbəsi"nin müdirinin müavini, 2021-ci idən "Maliyyə və texniki nəzarət şöbəsi"nin müdiri, 25 aprel 2022-ci ildən isə Azərbaycan Respublikası Audiovizual Şurası aparatının "Audiovizual yayıma texniki nəzarət, informasiya texnologiyaları və kommunikasiya" şöbəsinin müdiri vəzivəsində çalışmışdır.

Azərbaycan Respublikası Prezidentinin 14 aprel 2023-cü il tarixli sərəncamı ilə Azərbaycan Respublikası Audiovizual Şurasının üzvü (səlahiyyət müddəti 5 il) təyin edilmişdir.

İsa Məmmədov müxtəlif ictimai və elmi vəzifələr (1985-90-cı illərdə "Radiotexnika, Elektrotexnika və Rabitə" istiqaməti üzrə Azərbaycan Texniki Universitetində nəşr olunan elmi əsərlər məcmuəsinin məsul katibi, Azərbaycan Respublikası Rabitə Nazirliyinin Texniki Şurasının üzvü, 1997-ci ildən 2013-cü ilə kimi Azərbaycan Respublikası Təhsil Nazirliyinin Elmi-Metodiki Şurasının "Elektronika və rabitə" bölməsinin sədrinin müavini, Azərbaycan Dövlət Dəniz Akademiyasının Elmi Şurasının üzvü, Azərbaycan Texniki Universitetinin Elmi Şurasının üzvü, Azərbaycan Texniki Universitetinin nəzdində olan ixtisaslaşdırılmış doktorluq şurasının üzvü, onun elmi seminarının sədri, ixtisaslaşdırılmış doktorluq elmi şurasının sədrinin müavini, Azərbaycan Respublikası Prezidenti yanında Ali Attestasiya Komissiyasının Ekspert Şurasının Elmi katibi) daşımış və daşımaqdadır.

2016-cı ildə Azərbaycan Respublikası Prezidentinin sərəncamı ilə "Əməkdar mühəndis" fəxri adına layiq görülmüşdür. İsa Məmmədov bir sıra kitab, çoxlu sayda monoqrafiya və məqalənin müəllifidir.

Mübariz Əsgərov 20 yanvar 1962-cı ildə Ucar şəhərində anadan olmuşdur.

Orta təhsilini və hərbi xidməti başa vurandan sonra 1986-cı ildə Bakı Dövlət Universitetinin jurnalistika fakültəsinə daxil olmuş, sonradan təhsilini davam etdirmək üçün M.V.Lomonosov adına Moskva Dövlət Universitetinin jurnalistika fakültəsinə göndərilmişdir. 1992-cı ildə həmin ali məktəbi fərqlənmə diplomu ilə bitirmişdir.

1992-cı ildə Azərbaycan Dövlət Televiziyasında işə başlamış, böyük redaktor və bədii-eksperimental qrupun rəhbəri vəzifələrində çalışmışdır. Həmin illərdə "Və...", "Qulp" proqramlarının müəllifi və aparıcısı olmuşdur.

1998-ci ildən "ANS" müstəqil televiziya şirkətində aparıcı redaktor, müəllif proqramları bürosunun rəhbəri, baş prodüser vəzifələrində çalışmışdır. "ANS" televiziya kanalında yayımlanan "Qulp", "Mübarizə" proqramlarının müəllifi və aparıcısı olmuşdur.

2013-cü ildən "Qulp studio" MMC-nin təsisçisi və direktorudur. Həmin studiyanın istehsalı olan "Rezonans" proqramının müəllifidir. Studiyada fəaliyyəti zamanı "Xocalı dərsi", "Bir mətbuat konfransının tarixi", "Közərən xaç", "Şuşanın dağları qara dumanlı", "Ölüm hökmü – ömürlük cəza" adlı sənədli filmlərin istehsalında iştirak etmişdir.

Azərbaycan Respublikası Prezidentinin 29 aprel 2021-ci il tarixli Sərəncamına əsasən Mübariz Ağali oğlu Əsgərov 6 il müddətinə Azərbaycan Respublikası Milli Televiziya və Radio Şurasının üzvü təyin edilmişdir.

30 dekabr 2021-ci il tarixli 471-VIQ nömrəli "Media haqqında" Azərbaycan Respublikası Qanununda audiovizual media sahəsini tənzimləyən orqan kimi Azərbaycan Respublikası Audiovizual Şurası müəyyən edilmişdir. Azərbaycan Respublikası Audiovizual Şurası Azərbaycan Respublikası Prezidentinin 08 fevral 2022-ci il tarxli 1589 nömrəli Fərmanına əsasən Milli Televiziya Radio Şurasının hüquqi varisidir. Fərmanın 4.2-ci yarımbəndinə əsasən Milli Televiziya və Radio Şurasının səlahiyyət müddəti bitməmiş üzvləri həmin müddət bitənədək fəaliyyətlərini Azərbaycan Respublikası Audiovizual Şurasında davam etdirirlər.

2015-ci ildə Azərbaycan Respublikasının Prezidentinin Sərəncamına əsasən "Əməkdar jurnalist" fəxri adına layiq görülmüşdür.

Evlidir, üç övladı var.

Bəxtiyar Qaraca oğlu Balakişiyev 27 mart 1957-ci ildə Xocavənd rayonunun Əmirallar kəndində anadan olmuşdur.

1976-cı ildə Bakı Dövlət Universitetinin filologiya fakültəsinə daxil olmuşdur. 1979-1982-ci illərdə M.V.Lomonosov adına Moskva Dövlət Universitetinin jurnalistika fakültəsində təhsilini davam etdirmişdir.

1982-1989-cu illərdə "Dövlətnəşrkom"da redaktor vəzifəsində çalışmışdır.

1989-2006-cı illərdə Azərbaycan Dövlət Televiziya və Radio Verilişləri Komitəsində redaktor, şöbə müdiri və baş redaktor vəzifələrində çalışmışdır. 2006-ci ilin sentyabrında müəyyən səbəblərdən televiziyadakı işindən ayrılmış və müxtəlif kanallarla (TRT, Xəzər TV) əməkdaşlıq etmişdir. 2010-2016-cı illərdə "Azərbaycan" qəzetində şöbə müdiri vəzifəsində çalışmışdır.

2014-2015-ci illərdə Azərbaycan Respublikası Nazirlər Kabineti yanında Qarabağ münaqişəsi ilə əlaqədar yaradılan İtki və Tələfatların Hesablanması üzrə İşçi Qrupunun üzvü kimi fəaliyyət göstərmişdir. 2016-2017-ci illərdə "Azərbaycan Televiziya və Radio Verilişləri" QSC-də "Mədəniyyət TV" kanalının direktor müavini vəzifəsində işləmişdir. 2019-cu ilin fevralın 1-dən "Azərbaycan Televiziya və Radio Verilişləri" QSC-də yeni yaradılan Müəllif Proqramları və Xüsusi layihələr Departamentinin rəhbəri təyin edilmişdir.

Azərbaycan Yazıçılar və Jurnalistlər İttifaqlarının üzvüdür. "Meteor yağışları", "Yerlə göy arasında", "İstiqlal düşüncələri", "Hüseyn Ərəblinski" kitablarının, çoxsaylı məqalələrin, bədii və sənədli filmlərin müəllifidir.

12 mart 2019-cu il tarixdə Azərbaycan Respublikası Prezidentinin Sərəncamı ilə 6 il müddətinə Milli Televiziya və Radio Şurasına üzv təyin olunmuşdur.

30 dekabr 2021-ci il tarixli 471-VIQ nömrəli "Media haqqında" Azərbaycan Respublikası Qanununda audiovizual media sahəsini tənzimləyən orqan kimi Azərbaycan Respublikası Audiovizual Şurası müəyyən edilmişdir. Azərbaycan Respublikası Audiovizual Şurası Azərbaycan Respublikası Prezidentinin 08 fevral 2022-ci il tarxli 1589 nömrəli Fərmanına əsasən Milli Televiziya Radio Şurasının hüquqi varisidir. Fərmanın 4.2-ci yarımbəndinə əsasən Milli Televiziya və Radio Şurasının səlahiyyət müddəti bitməmiş üzvləri həmin müddət bitənədək fəaliyyətlərini Azərbaycan Respublikası Audiovizual Şurasında davam etdirirlər.

Bəxtiyar Balakişiyev Azərbaycan Respublikası Prezidentinin təqaüdünə və "Ali Media" Mükafatına layiq görülmüşdür. O, həm də, "Tərəqqi" medalı, "Heydər Əliyevin 100 illiyi (1023-2023)" və "Azərbaycan Xalq Cümhuriyyətinin 100 illiyi (1918-2018)" yubiley medalları ilə təltif olunmuşdur.

İki övladı var.

Telli Pənah qızı Əliyeva 24 may 1954-cü ildə Qərbi Azərbaycanın (keçmiş Ermənistan SSR) Vedibasar rayonunda anadan olmuşdur. 1971-1976-cı illərdə Bakı Dövlət Universitetinin jurnalistika fakültəsində təhsil almışdır.

1977-1980-ci illərdə C.Cabbarlı adına Respublika Gənclər Kitabxanasında baş kitabxanaçı, 1980-1981-ci illərdə Azərbaycan Dövlət Televiziya və Radio Verilişləri Komitəsində müxbir, 1981-1982-ci illərdə Azərbaycan Dövlət Televiziyasının Gənclik redaksiyasında kiçik redaktor, 1982-1992-ci illərdə Dövlət Televiziyasının ictimai-siyasi və iqtisadi informasiyalar redaksiyasında redaktor, 1992-1993-cü illərdə Dövlət Televiziyasının informasiya studiyasının "Günün ekranı" Yaradıcılıq Birliyi rəhbərinin müavini, 1993-1995-ci illərdə "Azərbaycan Dövlət Teleradio Şirkəti"nin informasiya xidməti rəhbəri, 1995-1997-ci illərdə Televiziyanın İkinci Proqramı üzrə direktor, 1997-2005-ci illərdə İkinci Proqram üzrə Baş proqram direktorunun müavini, 2005-ci ildən isə "Azərbaycan Televiziya və Radio Verilişləri" QSC televiziya proqramları direktorunun müavini vəzifələrində işləmişdir.

Telli Əliyeva 12 mart 2019-cu il tarixdən Azərbaycan Respublikası Milli Televiziya və Radio Şurasına Şura üzvü təyin edilmişdir.

30 dekabr 2021-ci il tarixli 471-VIQ nömrəli "Media haqqında" Azərbaycan Respublikası Qanununda audiovizual media sahəsini tənzimləyən orqan kimi Azərbaycan Respublikası Audiovizual Şurası müəyyən edilmişdir. Azərbaycan Respublikası Audiovizual Şurası Azərbaycan Respublikası Prezidentinin 08 fevral 2022-ci il tarxli 1589 nömrəli Fərmanına əsasən Milli Televiziya Radio Şurasının hüquqi varisidir. Fərmanın 4.2-ci yarımbəndinə əsasən Milli Televiziya və Radio Şurasının səlahiyyət müddəti bitməmiş üzvləri həmin müddət bitənədək fəaliyyətlərini Azərbaycan Respublikası Audiovizual Şurasında davam etdirirlər.

2006-ci ildə "Əməkdar mədəniyyət işçisi" fəxri adı, 2008-ci ildə "Tərəqqi" medalı ilə təltif edilmişdir.

Müxtəlif illərdə "Qızıl qələm", "H.Zərdabi", "Məmməd Araz", "Natəvan" mükafatlarına layiq görülmüşdür. "Ali Media" mükafatı laureatıdır.

Telli Əliyeva 3-ü şeir, 7-si publisistik əsər olmaqla 10 kitab müəllifidir.

Üzvlər